for all arabian

يا شعبي حبيبي يا روحي يا بيبي
ياحطك في جيبي يا بن الحلال
يا شعبي ياشاطر يا جابر الخواطر
ياساكن مقابر وصابر وعال
ياواكل سمومك يا بايع هدومك
يا حامل همومك وشايل جبال
ياشعبي اللي نايم وسارح وهايم
وفي الفقر عايم وحاله حال

احبك محشش مفرفش مطنش
ودايخ مدروخ واخر انسطال
احبك مكبر دماغك مخدر
ممشي امورك كده باتكال

واحب اللي شايف وعارف
وخايف وبالع لسانه وكاتم مقال
واحب اللي قافل عيونه المغفل
واحب البهايم واحب البغال

وأحبك تسافر وتبعد تهاجر
وتبعت فلوسك دولار او ريال

لكن لو تفكر تخطط تقرر
تشغللي مخك وتفتح جدال
وتبدأ تشاكل وتعمل مشاكل
وتنكش مسائل وتسأل سؤال
وعايز تنور وعايز تطور
وتعمللي روحك مفرد رجال
ساعتها حجيبك لا يمكن اسيبك
وراح تبقى عبره وتصبح مثال

حبهدل جنابك وأذل اللي جابك
وهيكون عذابك ده فوق الاحتمال
وامرمط ساعدتك وابهدل سيادتك
وتلبس قضيه وتصبح رزيه
وباقي حياتك تعيش في إنعزال
حتقبل ححبك حترفض حلبك
حتطلع حتنزل حجيبلك جمااااال